Амач лугьуз и патишагь

Амач лугьуз и патишагь, 
Заз са хабар ван хьана хьи.
Гьелбет, кечмиш хьунухь я агь, 
Гила дум-дуван хьана хьи.

Абаздална кьуна машин, 
Къулни чIугваз туна вичин. 
Я медал амачиз, я чин - 
КьецIил гьуьруьят хьана хьи.

Гафар гуьрчег, амал чIуруз, 
Фур атIайд аватда фуруз. 
3а фагьумна, бязибуруз 
И кар лап такIан хьана хьи.

Бязибурун веревирдер 
Бязибуруз хьана дердер. 
Ифтарай Николайдин сердер 
Дустагъдиз мугьман хьана хьи.

Нече шумуд губернатур, 
Эллеривай ришветар тIуьр, 
Инлай вилик пара гьуьндуьр 
Гьакимар аскIан хьана хьи.

Шумуд палкувник, генерал, 
Руг ацукьна гьакI чинерал, 
ЗатI аламачиз къуьнерал, 
Мягьтел яз гьейран хьана хьи.

Шумуд куьк затI хьана яхун, 
Амач уьтквем луькIуьн, рахун. 
Йикъалай - къуз чIугваз бархун 
Хирер лап яман хьана хьи.

Шумуд област, шумуд укруг 
Кутука салдатарин хурук. 
Шумуд са начаник - округ 
Тахъвана пиян хьана хьи.

Шумуд наиб, шумуд кавха
Сад садалай хьанай лавгъа, 
Арзачийриз лугьуз «кьей хва», 
Куь гъиле майдан хьана хьи.

Гагь кицIиз хьиз лугьуз «пошел!» 
Ришвет къачуз тагуз мажал. 
ТIимил - тIимил гила чи чIал 
Чир жез мусурман хьана хьи.

КьуьртIуь верч хьиз вичин чка 
Чирна ацукьарна мука. 
Инкъилаб, ваз хьуй мергьаба! 
Дердериз дарман хьана хьи.

Эй Сулейман, гила, гьелбет, 
Фикир ая вуна хевлет. 
Кеси6 юлдашариз медед 
Гьуьруьят заман хьана хьи.