Лацу приказ гваз са юлдаш
Къведа вичин чинни чIурна,
Кьудкъанни цIуд югъ вичин яш,
Гьар къанудал жез дежурна.
Сад къведа мад юзаз - юзаз,
Кесибарин гьалар жузаз,
Кьуна гъиле къацу приказ,
Хъипидалди ийиз чурна.
Векьер - кьалар кьуна сиве,
Къведа мад са сару деве,
Лежберарив кьада дяве,
Патахъ яракьар гьазурна.
Къвез хъфида са - сад, са - сад;
Гьисабнамаз жеда цIусад.
Гуьгъуьнлай къведа са масад
Вичив гвай къапар ацIурна.
Жерге - жерге, къатар - къатар,
Калхуз хьана чеб са кьадар,
Лежбердин тум цадай вахтар
Чидайд я и гьайван дурна.
СтIал Сулейман чи юлдаш
Пудкъанни вад йис вичин яш,
Я къелем гвач, я къарандаш,
Бес и чIалар гьикI туукIуьрна?
I937
Рубрика
Добавить комментарий