Ламран тариф

Гьинай атай лам я и лам,
И лам хьтин лам авай туш.
Гьар акурда чухвазва кьам,
И лам хьтин лам авай туш.

Ажеб гуьрчег я акунар,
Гьам луькІуьнар, гьам рахунар,
Уьтквем я хупІ ар ягъунар,
И лам хьтин лам авай туш.

КъекъвейтІани чун Иранда,
Багъдатдани Исфагьанда,
Гьатта къадим Хурасанда,
И лам хьтин лам авай туш.

Рекьер атІуз баябандин,
Кьиле ава ам карвандин.
Суракьдавай вич къалгъанрин,
И лам хьтин лам авай туш.

Ялиз хуш туш вичиз парар,
Яда амма даима ар,
ЯтІани ванцикай бизар,
И лам хьтин лам авай туш.

Ийин чна адан тариф,
Талгьана югъ, талгьана йиф,
Ихьтин са лам рекьиз гьайиф,
И лам хьтин лам авай туш.

13.04.2015