Гуьгьуьл

Жедай крар жеда чпиз,
Гъам чIугвамир вуна, гуьгьуьл.
Сирер ава цавуз, чилиз,
Фагьум ийиз, жемир сефил,
Гъам чIугвамир вуна, гуьгьуьл.

Акьул гуз жеч дилибуруз,
Бинедилай кимибуруз,
Намус жедач “вилибуруз”,
Фагьум ийиз, жемир сефил,
Гъам чIугвамир вуна, гуьгьуьл.

ЦIвелин тарар бегьерсуз я,
Дамах абрун тегьерсуз я,
Кьел кIуь жеда, шекерсуз я,
Фагьум ийиз, жемир сефил,
Гъам чIугвамир вуна, гуьгьуьл.

Цифер цавал къвез, алатда,
Йифер йикъар жез, алатда,
Цавун чинал рагъ ахкъатда,
Фагьум ийиз, жемир сефил,
Гъам чIугвамир вуна, гуьгьуьл.

Къвез хъфида ханарни кваз,
Ци тухуда къванерни кваз,
ЦIу кармашда чинерни кваз,
Фагьум ийиз, жемир сефил,
Гъам чIугвамир вуна, гуьгьуьл.

07.04.2014