РикIин тIал

Санал хьанач, са кIвал хьанач, къул хьанач.
Тупламишдай къуват хьанач, пул хьанач.
Халкьдихъ руьгьдин дестек хьанач, гул хьанач.
Бес Кьулан вацI чIур тежедай цал яни?
Югъ-къандавай гьатзава чун деркела1,
Куьмек авач я кIваляй, я къецелай,
Халкьдин вилик акъвазнавай месэла
ЦIилиналлай алуд тежер тIвал яни?
Мал-къарани тIимил жезва дагълара,
Майва кьери, хъач къалин я салара,
А виликан бегьер амач багълара,
Лезги чилихъ галукьайди тIал яни?
Лагь, идалай чIехи инад авани?
Паб-базарда, итим хьанва кайвани,
Хиве гьатна цурамай са данани.
Тум кьацIай сад, ам нехирда мал яни?
Алимар я, кIел тавуртIан улубар.
Уях хьанва чи хуьрерин хунубар2
- Хур гайила чIур жезвалда  кIалубар.
Ирид аял авачирди кIвал яни?
Баябан я хеб амачир яйлахар,
Чубан илиф тийиз перт я булахар.
Четинбур я лугьуз хуьре кIвалахар,
Шегьердин рехъ жегьиларин квал яни?
Аруш жезва къвез кIвачера нашияр,
ПицIни далу акваз къекъвез дишияр,
Гьар камуна гьалтзава вал гижияр,
Вил алайди къияматдин къал яни?
Манияр я дишегьлийрин тарифар,
Кьисмет хьанач лугьуз чIугваз гьайифар.
Кхьизвайбур халабажи теснифар.
Зи лезги чIал шит шурпайрин чIал яни?
Иви хъвана тух тежезвай нахаяр,.
Ягъиз-рекьиз чи квайни квай рухваяр,
Галуддани далудихъай архаяр?
Дуьнья гегьенш, чаз фир-тефир сал яни?
Сейфудин, на гьикьван гьалчда паркутар?
Уяхариз алахънава кубутар,
Эхиз тежез са жуьрени манкуртар,
Я кас, види дуьз чкадал къал яни?
_______________
1. Деркела - кIевера гьатун (нугъатдин гаф)
2. Хунубар (хунуб) - гъуьлуьк квай дишегьли (нугъатдин гаф)

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.