Гъезелар

Фейи йисар рикIел хквез, фикирри зун къарсурзава...
Заз аквазва зун фейи рехъ, - ам масадаз аян жедач.

Дуьньядин рехъ, кьисметрин рехъ, - куьн сад-садак какахьнава.
Дуьньядилай фин тийидай я гьаким, я султан жедач...

Гуьзел дуьньяда инсанриз бахтавар къар тIимил ава, -
Жезвай кьван мусибатрихъ са гьахъ-гьисаб, я сан жедач...

Суза ийиз больницада жегьил жаван рекьизва:
Пулсуз адаз куьмек гудай я дарман, я лукьман жедач...

Къунши - къуншидал пехил я; гьарда вичихъди ялзава.
Са къуншидихъ са шадвал хьун муькуь къуншидиз кIан жедач...

Садбур ава, чеб вине кьаз, винелайгъуз килигдайбур.
Гьикьван чанда ялар туртIан, чакъалдикай Аслан жедач...

КIвал гадарна, яргъаз фена, дережайрив агакьайдаз,
Къизилдин юкьва хьайитIан, гъурбатдикай ватан жедач...

Вич угъри яз, кьилел - чалма, - ихьтинбур чал дуьшуьш жеда.
ТIиш экъуьриз ина - ана, ам таквадай майдан жедач...

Фана дуьнья я им, дустар, сада-садан гуьгьуьл хамир.
Пис ксарихъ, гьикI хьайитIан, я дуьзвал, я иман жедач...

Вуна кхьей и гъезелрай гзафбуруз чеб чир жеда.
Килиг, Малик, гьакI тирвиляй а ксариз вун кIан жедач!