Азиз диде! Йифериз рикI секин туш

Азиз диде! Йифериз рикI секин туш,
Ви гъилеллай къабар вилиз аквазва.
Рехъ гуьзетиз, ахвар хьунни мумкин туш,
Ви нагъвар зи сефил рикIив рахазва.
Зи бубадин чIаларин къаб вилик ква,
Мердвилин тарс а къапунай къачунвай
Кьуръан хьана ви чарар зи гъилик ква,
А чарари рикI сабурлу авунвай.
Куьн къакъатна, накъвари рикI каначни?
- Чара касдиз къалурда гьикI ажузвал?
Шагь дагъларин маканда зун ханачни?
- ГьикI кьабулда лезги рикIи агъузвал?
Куьн галачиз девир тухуз четин я,
Югъди - йифди заз куь суьрет аквазва.
Рагъ аватIан, - йикъар гзаф серин я,
Сурухъ, рекьикъ рикIи суьгьбет тухузва.
Багъишламиш ая хциз, масанбур,
Куьн кучудиз зун вахтунда агакьнач.
Заз халкьдикай регъуь я къе, хъсанбур,
Сурухъ къванер акализни алакьнач.
Къе атана агалтнава сурал куь,
Дар нефесди хуравай рикI кукIвариз.
Марвардин яд хъичинна за хурал куь,
Темен гана векьи кьунвай накьвариз.
Хуьр пашман я, куь ширин сес авачиз,
Хтун тарни нагъв алахьиз-перишан.
Къушар ама шадвал - гьевес амачиз,
Билбилрини мани лузвач гуьлуьшан.
Вахтар фида. Мадни билбил шад жеда,
Манидин сес гьатда кIвале, хуьрени.
Къушаризни мадни гатфар, гад жеда,
Чаз илгьамдин цIай гузва куь рикIери.
Куь манияр лай-лай хьанва кьепIерин,
АлукIнава гъвергъверри таж рагарал.
Таъсиб хуьзва куь руьгьди чи рикIерин,
Хкаж хьана чаз экв патал цаварал.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.