Шаир Айдын Ханмегьамедоваз
Заз са шаир дуст авай тир Дербент шегьерда,
Гьич са касни акунач заз адан тегьерда.
Жегьил чIавуз къекъвенай ам Дон Жуан хьтин,
Шаир тир са, илгьам авай лап вулкан хьтин.
Акьулдални чирвилерал Абул-Ала* тир,
Гьар келима, жавагьир хьиз, гзаф ала тир.
Адахъ галаз гьуьжет жедай алим авачир,
Гафунал гаф эциг жедай гьаким авачир.
Яш юкьвалай алатайла буьркьуь хьанай ам,
Фелекдин цIу гьа и жуьре вахтсуз канай ам.
ЯтIани ам муьскIуьн тушир кьисметдикай гьич,
Гьисабдачир и дуьньядал бахтсузди яз вич.
Вилерин нур квахьнатIани, артух тир фагьум,
Чилеринни цаварин сир адаз тир малум.
КIубандаказ, кьил виневаз къекъведай даим,
Зарафатиз, шадвилериз, хъуьредай даим.
Ялна чпихъ са юкъуз ам урус чуьллери,
Есенина кIвач эцигай мублагь чилери.
Кефер патаз акъудна ам къайи гарари,
Дустар сефил, сугъул туна дердер-гъамари.
Адан чка ичIиз ама шиирдин кимел,
Макан кьуна ада вичиз фена гъурбат эл.
Яд атIай регъв хьиз ава ам квачир межлисар,
Девран гьялиз, майдандава анжах иблисар...
Шаирдин гьар са цIар, гьар гаф тир ширин шекер,
Ам хъфена, етим хьана чи Дербент шегьер!..
___________________
* Абул-Ала - арабрин чIехи шаир ва философ.
Добавить комментарий