Перейти к основному содержанию

Ац1узавач вил

Гьар хтайла Бакудай
Рик1 ац1удай тир.
Зверна фена булахдин
Рехъ ат1удай тир.

Гьикьван ч1ав тир такуна
Акъатна яргъаз.
Ц1игел хьанай рик1-тухул
К1аниди такваз.

Яваш-яваш яр къведай
Акунар ширин.
Перемрилай чир жедай
Ягъунар рик1ин.

Жегьилар жен са-сад к1ани
Рик1-рик1из мукьва,
Хъухъудачни к1анивилин
Цук1варин юкьва?
Рик1из атай бейхабар зуз
Вилей акъатна.
Эх жедайни ихьтин гуьзел
Гъиляй акъатна?
Дегиш хьана чинин рангар,
Ажуз жедай мез.
Са кеф-гьал тир жузадайди
Гьа элкъвез-хквез.
Авур вад гаф агъзур сефер
Тикрариз рик1е.
Вил к1ак1 тийиз шумуд йифер
Тунай за рекье.
Ашкъи чанда гьакь тавурла,
Куьк1уьдай илгьам.
Гьа и жуьре агакьдай зав
Шиирдин макьам.

И бахтавар дуьнья вири
Яр хьиз аквадай.
Жегьил ч1ав тир, уьмуьрда са
Гар хьиз акьадай.

Цуьк гьа цуьк я, рик1ни гьа рик1
Дегишди девран.
Вучиз пара юргъа хьана
Уьмуьрдин балк1ан.

…Фена вахтар яргъалди
Рехи жезва кьил.
Тух жез авач ярдикай
Ац1уз авач вил.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.