Хъуьт1уьз чи хизан

Кьуьд атайла дегиш жеда
Акунар к1валин.
Дегиш жеда кьуьзуьбур чи
Къекъуьн жез квелин.

Амукь тийиз рик1ин къене
Шадвилиз чка.
Хара жеда дарманрикай
Пенжердин дак1а.

Ягъаз рапар йикъа пудра
Къуншидин суса.
Акахьда чи бубад угь-ни
Дидедин суза:

- Агудмир зав, дарманни раб
Кук1вармир зи тан.
Кьуьзуьбурув жер кьван я угь
Хъвадач за дарман.

Хкаж жезва бубадин ван
Акъудна кисе.
Звер гуз ава мухуркадиз
Рахазва кьиса:

- А духтурдин к1валахар заз
Гьич дуьз аквадач.
Яхц1ур йисуз ч1угур тембек
Вучиз чугвадач?

Я к1уьд немир, я як немир,
Яни хьи гъери.
Дуьз итимдив и гафар жеч,
Акьулдиз кьери.

Я свас вуна, ц1ай винизна
Худ це хап1адиз
И акьулар гурай ада
Вичин бубадиз…

Рам авунвай, ялиз-звериз
Уьмуьрдин к1ук1уш.
К1анда хьи, заз амай уьмуьр
Фирай рик1из хуш…

Хъсан чида вуч рахада
Заз и легьзеда.
Алахъда зун рик1ера экв
Тваз и легьзеда:

- Алатда и къаяр – мекьер
Гад къведа ац1ай.
Мугьман жеда мад хтулар
Чаз гьар са патай.

Куьмекарда Заура чаз
Къакъажна кьве гъил.
Алимурад харувализ
Тадач чун сефил.

Дагъустандай хуькведа чаз
Цуьквер кваз кьилик.
Гъен шткуда Минасади
Ракъинлай вилик.

Еганеди дем къачуна
Вичин жуьреда.
Хъуьрез-хъуьрез чай гъида чаз
Экуьн береда.

Теранеди теред афар
Хъийида чаз мад.
Икьван пара «угь» мир куьне
Агакьзава гад.

Тофикни хьи, къуьне чанта,
Физ-хуьквез жеда.
Агакьда гад, чаз тухдалди
Мугьманар къведа.

Русим хкведа аскердавай
Кьегьалдин тегьер.
Тук1вада гьер, вири санал
Ийида кефер.

Тамиллади тади галаз
Акайда суфра.
Халу к1ани са руш я ам
Виридлай пара.

Насирани тутун тарак
Туьк1уьрна мангал.
Вадимак галаз, шиш элкъуьрда
Ийиз къалмакъал.

Кьил чугвада Венеради
Шарагарни гваз.
Штулариз манияр лагь
Хкажна аваз.

Надирани агудда гад
Халудихъ галаз.
Маринади «вад» ар гъида
Зачеткада ваз.

И арада дидед сивик
Акатзва хъвер.
Бубадизни хвеши жезва
Дидедлай бетер.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.