Зарафат

«Зегьмет чIугна Алиди
кIвал эцигна муркIадал.
Гьава хьайла чимиди,
Мурк цIрана, цIвена кIвал.

ХъуьтIуьз кIукIна Периди
Гъери авай бекьедал.
Гатуз цIрай гъериди
Адан рикIе туна тIал.

И ван хьайи Шихкамал
Зарафатриз къекъвена.
Алидални Перидал
Аяларни хъуьрена.

Инал зунни рахана
Шагьид кьуна жувакай,
Демек рикIел тахьана,
Верчер квахьай папакай.

МуркIвар гатуз кIевиди,
Гъери хъуьтIуьз жими туш.
Зарафатар я зиди,
Амма гьахъни кими туш.

1963

Рубрика