Ашкъидин цуьк

Вун акуна, вили кьуна, течиз кIани хьун,
Гуьзелвилел рикI цIурурна гьейран хьанай зун.
Фена йисар, фена варцар гьижрандин гъапа,
Хиялдайни амачир зи вун вилиз ахкун.

Эй ашкъидин цуьк
Вун галачиз рикI
КIвале шадвал хьайилани
Жез ава гъарикI.

Рча гъана, вун хтана, йиф акур рагъ хьиз.
РикI зи хура чIехи хьана, тах такур дагъ хьиз.
Аламукьнач адал садни гьижрандин гелер.
Хтана чан, хьана кIубан, цуьквед кьур багъ хьиз.

Эй ашкъидин цуьк
Вун галачиз рикI
Гъиле шадвал хьайилани
Жез ава гъарикI. 

Мад вилериз сифтегьан хьиз ахквадамаз вун,
Гьейран хьанач, кIубан хьанач, ашукь хьана зун.
ХъуьтIер акур, къаяр акур цуькни билбил хьиз,
Хвена гьуьрмет, хьана кьисмет, бахтавар я зун.

Эй ашкъидин цуьк
Вун галачиз рикI
Кьиле шадвал хьайилани
Жез ава гъарикI.

1963