Амукьна зун тамашиз

ТиртIан ялгъуз, жаваб тагуз,
Мадни наз гуз акурла,
ЧIулав вилер, лацу гъилер
ЦIай кьуна куз акурла,
РикI цIрана, мез кьурана,
Рахадай гуж кумачиз,
Амукьна зун нефес кьуна,
Ярдин чиниз тамашиз.

Хьана секин, кIани рикIин
Фикир якъин жедалди,
КIватI хъувуна къуват кьилин
Рахаз мумкин жедалди.
РикI цIрана, мез кьурана,
Чанда тIакьат амачиз,
Амукьна зун нефес кьуна,
Ярдин чиниз тамашиз.

«Жемир пашман, зи ширин чан
Хьуй ваз къурбанд» - лагьайла,
«Тек са вун я заз вун жув кьван
КIани инсан» - лагьайла,
РикI зурзана, гьекь кьурана,
Маса затIни кIамачиз, 
Акъвазна зун гъилер кьуна,
Ярдин чиниз тамашиз.

1960