Къуьлуькай хкатда

Эй, факъир, къаткимир гатуз, 
Чир хьухь, зулукай хкатда. 
Гьам цуькI, гьам мух хкваш гатIуз, 
Валлагь, къуьлуькай хкатда.

Вичин акьул вичиз ширин, 
Шумуд ахмакьдиз за чирин, 
Вад югъ я арабад серин, 
Хъуьтуьз кIваликай хкатда.

Семерушдал Кябе тIаваф 
Жедач, харжи кIанда гзаф, 
ГьакI нубатсуз мийир лаф - лаф, 
Итимвиликай хкатда.

Гьар са чакъал хьана сефил, 
Акьулдикай пара гъафил, 
ГьакI ашнадал жемир ви вил, 
Чир хьухь, гъуьлуькай хкатда.

Акъуда дуьз жаваб мецяй, 
Гъимир акьван ругун къецяй, 
Ягъ тавурла тум къайи цяй,
Вун балугъдикай хкатда.

Гьар са касдиз вичиз лайих, 
Суьлейман, эзбера къилих, 
Галамукьдач чухва къуьнуьхъ, 
Рухни кIаникай хкатда.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.