Къарагъ, лежбер эллер

Эй, юлдашар, лежбер эллер, 
Къарагъ зулун тумар къачуз. 
Хъсан михьи мухар, къуьлер 
Гьарда вичин вахтунда цуз.

Заз чиз, ам я хъсан кьегьел:
Тумуниз къарагъин эвел. 
Мийир куьне крар энгел - 
Са кIус йигин гьалда юзуз.

Ацукь кар чидайдан къвалахъ, 
Чира жуваз течир кIвалах, 
Жезамай кьван гзаф алахъ 
Куь майишат вилик тухуз.

Чи юлдашар, куьгьне тимар, 
Къайда чидай цадай тумар, 
Чи чкадин агрономар 
Кьамир куьне акьван ужуз.

Техил цунин еке шартIар:
Яд гудайдни жен вич устIар - 
Садални за эцигдач тIвар, - 
КIантIа кьилди, кIантIа калхуз.

Зурзуриз гьакI вичин лувар. 
Каш гваз къведач мад гьич гатфар. 
СтIал Сулейманан гафар 
Кьамир куьне пара агъуз.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.