Перейти к основному содержанию

Гуьзел яр

Гада

Гьайиф къведа заз ви кIвачер, 
Къекъвемир вун ях, гуьзел яр. 
Заз на тагуз вав гвай ичер, 
Инсаф авач вахъ, гуьзел яр.

Руш
Гьайиф къвемир ваз зи кIвачер, 
Туш абур члахъ, гуьзел яр, 
Гьинай гуда за ваз ичер? 
Гвач зав бахча, багъ, гуьзел яр.

Гада
Чугвадай кьван ви агьузар, 
Зи ширин чан хьана бизар. 
Гьикьван чIугван за ви азар, 
КъалатI дугъри ряхъ, гуьзел яр.

Руш
Ахьтин гафар рахаз наши, 
Хъуьруьрмир чал эркек, диши. 
Ca кепекни гвачиз харжи, 
Вaв гва хупI дамах, гуьзел яр.

Гада
Вун акурла, зун я гьейран, 
Гумир зи чандиз и зиян, 
Эй сивиз кьей таза жейран, 
Цуькведин яйлах, гуьзел яр.


Руш
КIан хьунухьни жеда, гьелбет.
Фикир ая вуна хевлет, 
ГьикI ятIа дуьньядин адет:
ЧIугу харжи, твах, гуьзел яр.

Гада
Ихтибар кьий масдан рушан 
Кутаз титаз вичик лишан, 
Ша акъудмир тIун на зи чан, 
Къалаз эрчIи хъвехъ, гуьзел яр.

Руш
Аквазва заз вун гъар сана, 
Иер фагьум ая вуна, 
Гьикьван къвазда вун ксана, 
Мус жеда уях, гуьзел яр.

Гада
Фагьумзавач на зи гьалер, 
Эхир чIурда на чи кIвалер. 
Чап килигиз заз ви вилер, 
Мийир зун къурвах, гуьзел яр.

Руш
Ваз чидач, - масдавай жузур, 
Гьа-гьа жуьре лишан кутур. 
Кьве миллион ая гьазур - 
Вегь жуван къармах, гуьзел яр.

Гада
СтIал Сулейман я шаир. 
Чизамач заз ийир - .тийир, 
Санал хьана хийир - шийир, 
Жен чун кьвед уртах, гуьзел яр.

Руш
На лугьудай гафун тегьер 
Жеч ярамиш, алагуьзли. 
Валлагь, и зи багъдин бегьер 
Хьанач дигмиш, алагуьзли.

Шаир
СтIал Сулейманан къайда:
Гьич масадаз къведач хатIа, 
ГьикIда бес чара хьайитIа 
Къавумдин руш, алагуьзли.

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.