Зи рикI алай дустари заз,
Гьарда са савкьват ракъана.
Гьардан мецелай са кагъаз
КIелиз аманат ракъана.
Гьарма сад зи са вилин экв,
Фагьум - фикир икьван зирек.
Зу хьтин фукъарадиз куьмек,
Еке тир савкьват ракъана.
Фикир чкIиз, гагь - гагь кIватIиз,
ГатIунна зун са затI кьатIиз.
Дустари заз цIинин хъуьтIуьз,
Еке майишат ракъана.
Авач хъсанвилин кьадар,
Эциг жедач завай я тIвар,
Заз акурд туш ихьтин затIар.
Им вуч мужизат ракъана!
Лугьуз гатIуртIа вун сиви,
Дегиш жеда инсанд иви.
Икьван вичин сирни кIеви,
Лайих гьикаят ракъана.
Бейбаладин хъсанвилер,
ВацIаран жеч акьван селлер.
Сулейман, ваз чир хьухь гьалер,
Гьадан хъсан затI ракъана.
1930
Рубрика
Добавить комментарий