Акьуллуда вичин велед

Акьуллуда вичин велед 
Гьич кьуьзуьдаз пабвиле гуч. 
Нагагь хьайтIа гьам набелед, 
Эхир пашман жез я гьам вуч.

Кьудкъанни цIуд йис дережа, 
Вич кIвегь атIай гьакIан къужа. 
Эхир гьатда крар гужа, 
Сад садаз гьич жедайд туш хуш.

Кьудкъанни цIуд хьанаваз яш, 
Йикъалай - къуз гьални яваш, 
Вичиз кIанда вичиз юлдаш 
ЦIувад савай са жегьил руш.

СтIал Сулейман я устIар, 
Фагьумдайд я пара затIар. 
Паб я лугьуз эхцигна тIвар, 
Вичиз къуллугъдай са чавуш!

I924