Зун хьана ашипка

Дустар, хьана зун ашипка, 
Лугьудай гаф течиз сивяй. 
Заз регьят яз акур чка 
Рахазава цавай – цавай.

Минет хьуй, халу Фетиллагь, 
Жезамай кьван ая ислягь, 
Шагьмирзедизни вуна лагь, 
Акъуда кван зун и кIевяй.

ЦIуд лугьудайд Уьсейбала. 
Алимирзе, нани яла, 
Шихбаладиз дерди къала:
ТуькIуьр жедайд я вичивай.

Мегьамед а арада тур 
Хци ятIа нагагь ви тур. 
Садавай туш, заз и хатур,
 ТIалабун я магьледивай.

Тавурай гьич а хиялар, 
Валлагь, писбур туш аялар, 
Кьазмайраллай а Агъалар 
Гьаман дуст я зав кIевелай.

Зи къавумар я Къенберар, 
Акьван тагуй гаф дилавар 
Куьне зазни ягъна парар, 
Рахаз жедач квевди завай.

ЦIурурмир тIун зи рикIин пи, 
Инсаф жедач, юлдаш Неби. 
ЯлайтIа къавурма чпи 
Кар туькIуьр жеда чпивай.