Ша жемир - тIун вун чаз мукьвал,
Къваз чавай яргъаз, самавар.
Твамир тIун чи арада къал,
Пис фитне, гъавгъа, caмaвap.
Паташов вич хьайла зурба,
Эцигна келледал турба,
Фагьумда на кIвални уба,
Бугъ акьаз къава, самавар.
Им са деб гьатнава чина
Михьи яд цаз таз пичина,
Атайла мугьмандин чина
Уьзуьагъвал я самавар.
Чайчиди цаз нубат - нубат,
Ягъиз нa цIикьвед макьамат,
Гьар са гьава гьар са бубат,
Межлисдин агъа, самавар.
Жергедаваз истиканар,
Жунгавди хьиз ийиз ванар,
Ава кьван вахъ ажеб гьунар,
Гум аршда, цава, самавар.
Даим хъваз на и къарасу
Гьич ви рикIел къведач хьи зу.
Ширин чайдихъ галаз насу
Чандиз я дава, самавар.
Попов чай хьайла багьа тир,
Магьледизни чкIиз атир,
Кесибариз чирун къадир
Туш мирвет, рава, самавар.
Гьи касдиз хьайитIа девлет,
Гьадаз вуна ийиз гьуьрмет,
Кесибариз тийиз рябет,
Жеда вун лавгъа, самавар.
Эхцигайла ахшам сегьер,
Ялгъуз хъунухъ я вун зегьер.
Сулейманаз чида тегьер,
Фагьум кван жува, самавар.
Добавить комментарий