Бязи ахмакьар

Бязи ахмакьарин уьмуьр 
Физ ава, кьуьд - гад тийижиз. 
Нубатсуз пуч ийиз хемир, 
Вичин сивин дад тийижиз.

Иеси кьей Куьре округ:
Дамах жеда бязибурук, 
Кутаз кIанда дуьнья хурук, 
Вичиз сад чиз, къад тийижиз.

Лап шад - хуррам хьана фяле, 
Гьуьруьятвал кьуна гъиле, 
Заманадин эхир кьиле 
Вуч аватIа мад тийижиз.

Я хва кьей кас, вуч япалух, 
Кар фагьумдач вилик - кьулухъ, 
Ийиз рикIи къалабулух, 
Вичиз я геж - фад тийижиз.

Фагьумна за бязи нефсер, 
Ахмакьвилиз авач эсер, 
Буьркьуьда гьикI гуда вязер, 
Каламни аят тийижиз?

Бязи иблисдин шакIуртар, 
Ийиз чIуру веревирдар, 
ЧIугваз кIанда еке шуртIар, 
Вичиз я кьуд - вад тийижиз.

Шагь жезава гьар са хахул.
Шумудаз бес чIугвада къул? 
Гъейрибуруз гуда акьул, 
Вичиз авай пад тийижиз.

Т1имил - шимил дахутдикай, 
Пай кваз вичиз захутIдикай. 
Рахаз мержан - якъутдикай, 
Вичиз вилин хат тийижиз.

Эй, Сулейман, на и ванар 
Низ хьуй, лугьуз, гьалчда къванар? 
Гьар са лам деве хьана нар, 
Вуч вичин къуват тийижиз.