Дербен шегьердин суракь ава

Фикирдиз гьваш: вири дуьнья  - 
И шегьердин суракь ава. 
Дербен лугьуз сифте бине 
Кутуникни дамах ава.

Ажеб гуьзел шегьер я им, 
Гьич тежедай тегьер я им, 
Уьзуьмрин бул 6егьер я им,
Гьар камуна са багъ ава.

Ухшар я Багъдаддиз шикил, 
Ачух жеда гьар са гуьгьуьл, 
Са пад дагъ я, са пад я гьуьл, 
Майдан, къурух, яйлах ава.

Гьализ балкIан, гьализ файтун, 
Гур я кIвалах хъуьтIуън, гатун, 
Бухарадин бармак, палтун 
АлукIунин саягъ ава.

Рахадайла мецер ширин, 
Агьалияр акьул дерин, 
КIватI жез санал багъда серин, 
Чар - гьавизни булах ава.

УстIарар я куьче - куьче,
Гьардаз ава вичин пеше. 
Пенжерайра буьлуьл шуьше, 
Гьаят, балхун, утагъ ава.

Мугьманар къвез гьар чкадай, 
Гьам Ахцегьай, гьам Къубадай, 
Аштерхандай, гьакI Шурадай, 
Гьарнай ина къунагъ ава.

СтIал Сулейман я зи тIвар, 
Рахадайд туш алачиз кар, 
Акуна заз гурлу базар, 
Гьар жуьре къаб-къажах ава.