Бендедин рикi хьайитiа дуьз

Бендедин рикI хьайитIа дуьз, 
Гьич са кар чIуру жедайд туш. 
Таб мийир на - дишегьлидиз 
Спелар, чуру жедайд туш.

ГьакI нубатсуз акъисиз кьам, 
Чидач ваз рахадай макъам, 
Заз акуна асландин хам 
Ам вид хьиз цIару жедайд туш.

Я «вперед» течиз, я «назад», 
Заз акуна шумудни сад 
Таб рахамир, виртIедин дад 
Сирке хьиз цуру жедайд туш.

И кьве кIвач квай маларикай - 
ГьикIда авам гьаларикай, 
Са хъуьчIуьк квай тIваларикай 
Къафкъаздиз пару жедайд туш.

Эй факъир ахмакьрин кавха, 
Я ериш течир, я юргъа, 
Намерддикай я ваз арха, 
Куьмек яз далу жедайд туш.

Ви тIиш на хъурта туналди, 
Гуж ийиз на ам тIуьналди, 
Эхир масдан затIуналди 
Ви руфун дулу жедайд туш.

Фикир ийиз килиг чилиз, 
Акьул жем ая ви кьилиз, 
Вад кицI аватналди гьуьлуьз 
Анин яд кьалу жедайд туш.

Бязибурун веревирдер 
Йикъалай къуз жеда бетер, 
Гьар инсандин жуван дердер 
Ашкара къалуз жедайд туш.

Эй Сулейман, вун я уста, 
Герек туш заз чирун масда, 
Ихтибарна, гьар межлисда 
И чIалар лугьуз жедайд туш.

I936

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.