Куьгьне заманда

Юлдашар, куьгьне заманда 
Кесибдиз тарсар авачир;
Гила хьайи регьят къайда, 
Бахтавар къар, cap авачир.

Залум нефсер авай фекьи, 
Кулакриз рехъ къалаз гьяркьуь, 
Батракар гьакI тадай буьркьуь, 
Дуьньядкай хабар авачир.

Гьар са кулак хьана бала, 
Акьахдай ам лап чи кIула. 
КIандатIа мектеб, ушкула, - 
Ана мад чи кар авачир.

Гьар са девлетлу чи мидя, 
Ивияр хъваз рикIер недай. 
Гила хьтин рехъ къаладай, 
Чаз ихьтин устIар авачир.

Залумрикай регъуь-кичIе, 
ГьакI хьунухь тир и чи пеше, 
Фяледин гаф фидай ише - 
Я ихьтин базар авачир.

Хифетлу яз юкъуз, йифиз, 
СакIан тежез хьана ажиз, 
И чи юлдаш дишегьлидиз 
Гьич са ихтияр авачир.

СтIал шаир Сулейманаз 
Кар гьа икI акуна гъараз. 
Гьич кесибдиз къелем, кагъаз 
Кхьидай дафтар авачир.

I937