Гьич са гъейри пачагьлугъра
КукIунни рахун кими туш.
Чпи чIурна чпин apa,
Сада сад ягъун кими туш.
Газетрай чир жеда сирер,
ЧIур хьайи шегьерар, хуьрер;
ЦIийи хъижез куьгьне хирер, -
КIаникай бархун кими туш.
Винизда агъузди гатаз,
КIанда вичин пацук кутаз,
Гъалибвилив сада садаз
Гьелегь - булагь кьун кими туш.
Гьелбет, жеда са пад ажиз,
Вичиз гьакI къуват авачиз.
3аз ван хьана, чпи чпиз
ТIуб сара жакьун кими туш.
Бязидан гьал хьана яваш,
Вичиз патай вегьиз лапIаш.
Гьадан кIвал, мал ийиз тараш
Сада сад чапхун кими туш.
Заланз къалаз вичин сая,
Агъуздал илигна пая:
Арадаваз кая, кьея,
Эвер - гьараюн кими туш.
Са патаз хьанамаз кичIе,
Физ амукьдач я ам ише.
СтIал Сулейманан пеше
Чидай кар рахун кими туш.
I935
Рубрика
Добавить комментарий