Михеннатдихъ тайин жаваб 

Михеннатдихъ тайин жаваб 
Хьана, я керчек жедайд туш 
Вич асулдай ктIай канаб 
АтIлас храз пек жедайд туш.

Агъамир намерддин мецихъ, 
Хийирдай акъудда къецихъ. 
Гзаф пул гуналди хъицикь 
Намус квай бермек жедайд туш.

Алхендиз лейсан тийижиз, 
Я ужуз, масан тийижиз, 
Вичиз пис - хъсан тийижиз, 
Я ам ваз куьмек жедайд туш.

Гьич ичин ни авай чичIак 
Жедайд туш, на ийимир шак.
Кьула гапур, кьилел бармак 
Хьуналди эркек жедайд туш

Я тепе течиз, я дере, 
Гагь - гагь тIвал эцяда хире 
Иеси кьей зулун фере, 
Эхир вакай кIек жедайд туш.

Гьар са касдин вичин ният, 
Фагьум ая намус, гъейрат. 
Вич асулсуз къара хейрат 
Чамардиз герек жедайд туш.

Фагьумна дуьньядин саягъ, 
Сулейман вич хьана уях. 
Катран кIвачел жеда къармах, 
Ам пехърез хьиз кек жедайд туш.