Иеси кьей къара пул

Эй, иеси кьей къара пул, 
Вакай якъут дуьрр жедайд туш. 
Гьар намерддиз гуналди пул, 
Дережа гьуьндуьр жедайд туш.

Гьелбет, вун я жеди лавгъа - 
Эхир кьил акьада чарха. 
Михеннатдиз лугьуз агъа, 
Адаз гардан кIир жедайд туш.

Заз акуна шумудни сад - 
Сафра жедай къарасуд яд. 
КIан хьуналди виртIедин дад, 
ЧIур хьуналд чехир жедайд туш,

А бенде хьуй уьзуькъара:
Гафар - кишмиш, тIуьрла -  къура. 
Жемир, фекъир, адав ара, 
Адахъ дуьз фикир жедайд туш.

Крар - ажуз, гафар - зурба, 
Шейх лугьуз, галчукна аба. 
Нафт авачир ичIи лампа 
Вавай ам куькIуьр жедайд туш.

Амал - бетер, гафар -  ажиз, 
Яб гумир на адан мециз, 
Серф гьатайла къастда кIасиз, 
Дуствилин эхир жедайд туш.

Гьарда вичин дуланажагъ 
Иер фагьум ая, къуччагъ. 
Гъиле теспягь, кьула кьуршах 
Хьуналд итим чир жедайд туш.

Сулейман вич я жед уста, 
Чирун герек авач масда. 
Яд квачиз кьуру паласда 
Кутуналди хир жедайд туш.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.