Перейти к основному содержанию

Заз акуна сад

Я дустар, заз акуна сад, 
Дамах гваз гъил эчIевайди, 
Вирт я лугьуз заз хьана шад, 
Шур я кьван вич кьечевайди.

Фагьумна за вичин тегьер:
Сив кьакьунда сегьер - сегьер. 
Гьи жуьре ваз кIантIа зегьер 
Я къапуна вичевайди.

Нагагь са затI вичиз къаншар 
ТахьайтIа, ав чIугвач нашар. 
Тумун кIвенкIвел аламач чIар -  
Йифди - югъди гъуьрчевайди.

Вич залайни фейи фяле, 
Къан аваз къекъведа пеле. 
Акурлахъди фида зегьле, 
Патрумдаш я хъуьчIевайди.

Фагьумдач жегьил, я къужа, 
Жизви крар твада гужа. 
Хва кьей касдин буьркьуь ружа 
Даим вини кIвачевайди.

Сеферда фер, къар чIугуниз, 
Давамлу я пар чIугуниз;
Айиб мийир, ар чIугуниз 
Даим вичин пешевайди.

Я акъвазич сивни секин, 
Я вав гуч рахадай мумкин. 
Далу вичин гьахьтин секин, 
Ишлемишиз вижевайди.

Вичиз вич тим хьиз жез еке, 
Фитнедивди чIуриз уьлкве. 
СтIал Сулейманан рикIе 
Экв аквадай шуьшевайди.

19I4

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.