Фана дуьнья

Гьич са касдиз къвеч вакай хуш, 
Дамах мийир вуна, дуьнья. 
Эхир вакай ватан жез туш. 
Вун я гьакIан фана дуьнья.

Ви гьалдикай кьуртIа хабар, 
Садани гъич вал ихтибар. 
Гьар къавмуниз - пайгьамбарар, -  
Бес абур вутI хьана, дуьнья?!

Эвелдай чи буба Адам, 
Абужагьла ягъай далдам, 
Девлерин душман а Рустам, 
Абур гьиниз фена, дуьнья?

Нури - Лиллагь тир а кас чи, 
Аллагьди дуст яз кьур вичи, 
Калам назил хьайи уьлчи, 
На гьиниз ракъана, дуьнья?

Чи винел, чIуру яз къастар, 
Тунач на Раббидин - дустар. 
Меккедин кIвал авур устIар, 
Ам гьинихъ элкъвена, дуьнья?

Гьар гьи касдихъ хьайтIа мукьуф, 
By паталди ийич гьич уф. 
Жамалэгьли ахьтин Юсуф, 
Амни вуна кьена, дуьнья.

ХупI хасият ава вахъ пис, 
Таб жез туш аят, я гьадис, 
Шерик кьуна жуваз иблис, 
Зи рикIиз вун къана, дуьнья.

Калимуллагь Муса, Иса, 
Ахпа Али ал - Муртаза, 
Расулаллагьд авур кьиса 
Вакай пис рахана, дуьнья.

Ихтибар вал хьунал пара, 
Эхир жез туш вакай чара. 
ЧIугур Намруда минара, 
Амни вуна ярхна, дуьнья.

Крар тваз вуна нубатда, 
Эвел цайи цил акъатда.
Мягьшердин къуз ара сатда, 
ГьикIда бес на гьана, дуьнья?

ХупI пис тушни ви хасият, 
Муъминдин жеч вахъ авсият. 
Сулейманан и насигьат, 
Чидач, гьида кьада, дуьнья.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.