Кьиникьикай гьиниз катин?

Шаир юлдаш, са газетда 
Заз гьа ви шикил акуна. 
Чир хьана заз чIуру къайда
КьецIила ви кьил акуна.

Шаир юлдаш, вун Абдуллагь, 
Язамач хьи мад вун гумрагь. 
Хзанариз «куьн сагърай» лагь. 
Заз ви гьал муьшкуьл акуна.

КIватI  - хьана вал мукьва эллер, 
Вилерай къвез накъвад селлер. 
Дегиш хьана лап ви гьалер 
Заз ви гьа кьве вил акуна.

ЯтIан кьиникь гзаф четин, 
Адакай бес гьиниз катин? 
Чир хьана заз и дуьньядин 
Ихтибар тIимил акуна.

Максим Горки юлдаш тутур 
А Пушкиназ тавур хатур, -  
Эхир чални илигна тур, 
Дуьнья заз пехил акуна.

СтIал шаир Сулейманаз
Ийиз чидач дуьньядиз наз. 
Яргъандикай хкатнаваз, 
Заз юлдашдин гъил акуна.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.