Зи рикI пара хьана чIулав,
Хажалат пар хьана санбар:
Яна лугьуз азиз Киров
Агакьна чаг чIуру хабар.
Шумуд ятIан чидач заз яш.
Пара гьайиф тир а юлдаш!
Асланд къилих авай дирбаш,
Яру тур адан къарандаш -
Гьич алахьич адан хатIар.
Душманарихъ хьанач рябет -
Чи юлдаш кьенатIан, гьелбет,
Ам вич рахай ширин суьгьбет,
Виш агъзур суз даим, гьелбет,
ЧIур жедайд туш адан дафтар.
Гьич са душман чеб тахьуй шад,
Чпи расай зегьердин дад
Эхир чпив хъваз туна мад.
Кьел тIуьрбурув хъваз тада яд -
Чахъни ава гьахьтин къастар.
Тамам и дуьньядин эллер
Хъваз хъфейтIан, жедач гелер:
Балшавикдин дерин гьуьлер,
Ви акахьна атай селлер,
3vpбaбyp я абрун вацIар.
Ахьтин пехъер, чIулав нуькIвер,
Кими жеч чакъалар, сикIер.
Чи бахчадин яру цуьквер
Акваз а душмандин рикIер
Жеда, гьелбет, патар - патар.
Гьич са затIни вичив гвачир.
Я фагьум - фикир авачир.
Пуд кепек къиметдик квачир.
Финифалди ахьтин чIимчIир
Агъуз жез туш филдин япар.
Балшавиквилин лепеяр
ЧIур авур дагълар, тепеяр
Жезамай кьван пара иер,
Гьинай куькIвейтIан а цIаяр,
Хкадариз чун я устIар.
Душманарин зегьердикай,
ГалукьнатIан эсердикай,
Вичин жедай тегьердикай
Гьич эксик жеч бегьердикай
Чи властдин багъдавай тар.
Гьикьван жакьвайтIан чпи пIуз,
Эхир чеб амукьда куз - куз,
Зерре туш чи рикIиз къурхуз.
Агъа СтIаларин калхуз -
дал эцигна Кирован тIвар.
Душманарин фитне, фикир
Чпин чинал хьана зикир,
Дуван тадиз хьана туькIуьр
СтIал Сулейманан фикир
Фагьумдайд я гзаф затIар.
I934
Добавить комментарий