Перейти к основному содержанию

Гьинама?

И замандин рикIиз регьят 
Хьунухьин эсер гьинама? 
Гьич са макъам, гьич са сергьят 
Фидай а сефер гьинама?

Иер гуьзет ая, халкьар, 
ВутI  хьана куь бахтавар къар? 
Бес эвел квез акур ахвар 
Аквадай йифер гьинама?

Гьар са шей чаз хьана масан - 
Гьелбет, аси хьун я инсан. 
Чаз шафагьат абулейсан 
Къвадай а цифер гьинама?

ЧIугваз туьнт гиргирав туьтуьн, 
Резинд калуш тир хьи буьтуьн. 
Чухва - магьут, валчагъ - сатин, 
Бес чаз а кефер гьинама?

Марфадин яд къвазна пипIе, 
КтIай вири гузва лепе. 
Сад хьанава дере - тепе, 
Агъани нуькер гьинама?

Иер гуьзет ая, къуччагъ, 
Гьарда вичин дуланажагъ. 
Бес на хъвазвай а попов - чай, 
Лагь, а ви шекер, гьинама?

Чир тежез айгъурни ахта, 
Ягъиз кIуру хада тахта.
Къафкъаз хьтин туькIвей багъда 
Бес недай бегьер гьинама?

Рабби, ви садвилин шуькуьр -  
Сулеймананд им я зикир. 
ЧIугвадай кьван дуьньяд фикир 
Бес вилин эквер гьинама?

I93I

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.