Хьухь тiун вун уях, мусурман

Ша, жемир вун акьван авам, 
Амукьда кьулухъ, мусурман. 
Течирвилел хьана давам, 
Яз ви гьал язух, мусурман.

Фагьум  - фикир ая, килиг, 
Гьар са миллет физва вилик, 
ЧIугуна кутIунна кьилик 
Ксумир яйлух, мусурман.

ЦуькIуьн фуни буьркьуь къафун -  
Гьанал машгъул хьанава вун, 
МетIерал вегьена руфун, 
Мус жеда вун тух, мусурман?!

Гьар са миллет гьатна кIвенкIве, 
Туна тагьси6 вичин рикIе, 
Крар яваш, гафар еке, 
Течиз нету, юх, мусурман.

Акьул тIимил, уьмуьр гзаф 
Яшамиш хьун жедан инсаф?! 
Чир хьухь жуван лугьудай гаф, 
Фагьумна рахух, мусурман.

Сел къведайла вацIун кьилял,
Инсаф яни фин ахварал?! 
Бейхабардиз ксуз, хурал 
ЧIугвамир тIун рух, мусурман!

Шумуд душман, шумуд хаин, 
Къаст гьам я - вун барбатI ийин, 
Гьикьван жеда вун архайин? 
Жедани лайих мусурман?!

Ахмакьвилик квай са азар, 
Чир тахьун я хийир - зарар, 
Ваз мус чир хьуй кхьиз цIарар
Дуьньяда ачух, мусурман.

Я ушкула, я ваз мектеб,
Авач са марифат, эдеб, 
Сулейманан рикIин метлеб 
Хьун я вух уях, мусурман.

1929

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.