Пуд СтIалар хьана пашман,
Кьена къе устIар Исмаил.
Гьатна гьардан кIула залан
Хажалатдин пар, Исмаил.
Гьар гьи кас я кIвалахдал мерд,
Жемятдиз я хайи велед,
КьенватIани къе ви жесед,
Амукьда ви кар, Исмаил.
АтIуз жедач чавай умуд,
Ви еридал хквед шумуд,
Ракь муьтIуьгъ тир акьван Давуд
Кьена пайгъамбар, Исмаил.
Лежбер стхаярин куьмек,
Гьар са кIвале ишигълу экв,
Вахъ эрзиман диши - эркек
Ама жемятар, Исмаил.
Дуст кьена, зи рикI атIана,
Дуьньядикай гевил хана,
СтIал шаир Сулеймана
Квадардач ви тIвар, Исмаил.
Рубрика
Добавить комментарий