Перейти к основному содержанию

Эй бенде, вахъ...

Кьиникьикай хьана гъафил, 
Фикир хупI ксанава ви. 
Намрудалай пара къуват, 
Мад гьиниз кьван чан ава ви?

Эй бенде, вахъ авач камал, 
Аллагь рази жедай амал. 
И дуьньядлай гваз фидай мал 
Вуч ужуз - масан ава ви?

Фагьум жуван диде - буба, 
Эй факъир, ая тIун туба. 
Ви кьилив вун гзаф зурба, 
РикIе хупI аслан ава ви.

Башламишна кар чкадай, 
Вахъди гьахъ - гьисаб чIугвадай, 
Вичиз акваз, ваз таквадай 
Бейхабар мугьман ава ви.

Ашкъидивди ийиз на къал, 
Акваз - такваз ви мал - жамал, 
Aм  ca вад къан яргъал - мукьвал 
Жедай ca дуван ава ви.

Вун бенде яз халкьна зирек, 
Фагьум - фикир кIанда герек, 
Гьар къуьнел алаз ca мелек, 
Пис - хъсан къаланава ви.

Твамир чанда акьван хухвар
Куьз герек я ви дамахар? 
Азраилди кьурла гъаргъар, 
Аниз вуч дарман ава ви?

Я амач макан, я ери, 
Халкь авур алемар вири 
Аллагьдилай маса гъейри, 
Лагь кван, вуч бег, хан ава ви?

Эй, Сулейман, дуьз я ви чIал,
Гьич вядедиз жедач мажал. 
На ваз къведач лугьуз ажал, 
Вуч фикир - гиман ава ви?

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.