Перейти к основному содержанию

Гуьгьуьлдиз

Гуьгьуьл, за ваз са насигьат 
Гун - вун секинз акъваз, кьейди. 
Бейвафадивди авсият 
Кьамир вуна мукьваз, кьейди.

Дар лакьанда эрчIи къвалахъ, 
Кьве гъил, кьве кIвач хьана члахъ, 
Эхирки дуьньядин чIалахъ 
КIан жемир ваз агъаз, кьейди.

Мягькем яз акьална вилер, 
КIватI жеда ви гъенал эллер. 
Хурал тIарам хьайла гъилер, 
Жедач, валлагь, агъваз, кьейди.

Сад хьиз жед ви йикъар - йифер, 
Гумукьдач вав инин кефер. 
Мукьвал акваз фидай сефер, 
Акъатда вун яргъаз, кьейди.

Михеннатдив жеда гьилле, 
Вуна ви серф гумир гъиле. 
Эхирки къурмишна желе, 
Къаст я адан вун кьаз, кьейди.

Фагьума дуьньядин гьалар:
Гьиниз фена Али, Умар?
Эй факъир, дуьньядин къумар
Жедач вавай къугъваз, кьейди.

Им дуьнья я - карвансара, 
Кьуна хуьз жеч вавай сара. 
ГьикIда вуна мичIи сура, 
Лакьанда кьил акьаз, кьейди?

Хьана къвазмир вун бейхабар, 
Кьамир кIула ваз четин пар. 
Са къуз ви къуншийрин папар 
Гьатда вахъ чIар чухваз, кьейди.

ЧкIайлахъди ви кIвял - кIараб, 
Лугьуд вуна: гьикIин яраб? 
Гьар патахъай илан - ашраб 
ГатIунда вун жакьваз, кьейди.

ГайитIан на дуьньядин мал, 
АкI сагълугъ яз тач вун кимал, 
Вуна авур гьар са амал 
Чинал кIелда кагъаз, кьейди.

Галукьда вахъ маса афат, 
Аламукьдач вал и суфат. 
Сулейманан гаф зарафат 
Кьамир акваз - акваз, кьейди.

1924

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.