Шиир кхьиз кlанзава заз

Шиир кхьиз кlанзава заз
И шегьердай хтай рушаз.
Хъуьрез-хъуьрез хабарар кьаз, 
Накь зи патав атай рушаз.
Муьгьуьббатдин ви дерт чlехи 
Сакlан жезвач завай эхиз
Лугьуз завди кlвализ вичи
Вичин шикил вугай рушаз.

Дагъдин марал хьтин хару,
Хъуьхъвен кьилер нар хьиз яру,
Тарифдайвал акурбуру,
Зардин кифер авай рушаз.
Гагь хуьре жез, гагь шегьерда,
Кьиляй-кьилиз са тегьерда,
Гьатна вичин дуьз бегьерда,
Хур гими хьиз ацlай рушаз.

Абур, камал хуьзди вичин,
Гафардай заз ширин-ширин
Лацу чинал къаймах хьтин,
Къуша кlве хал алай рушаз.
Вилера хъвер авай ачух,
Вири рушарилай артух,
Тамашиналди жедачир тух,
Миллиардрик галай рушаз.

Ашукь жер вал акур гада,
Яргъи кифер дуьз бурмада,
Гьамиша хуьз са формада,
Виш гьалкъадив храй рушаз.
Гуда лугьуз даим за ваз,
Туна яргъал умуд алаз.
Шаир Къилягьви Къудратаз,
Залум дидед тагай рушаз.

Эвелан хьиз гумачиз наз,
Акъудна кьил гьакl хураваз
Элд виликай акваз-акваз,
Са низ ятlан тухвай рушаз.
Вич тахьана кlани садаз,
Гана лугьуз дидед гьадаз,
Йифиз-юкъуз фикир чlугваз,
Кьал хьиз кlвачел кьурай рушаз.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.