Чешне хьиз

Яш жердавай агьилвилин 
РикI жеда хьи, къачуз гъалаб.
Руьгь динжда лайухвили,
Гьайифдини - гуьгьуьл харапI.

Мурадрив вун агакьнатIа,
Кьил тик кьуна къекъведа вун.
Лайихсузвал нагьахънатIа,
Гьайиф чIугваз, ишеда вун.

Илгьам къачуз алакьнатIа,
Гьакъикъатдив хьана мукьва.
Мукьва-кьили чIалахънатIа,
Сейли я вал стха-арха.

Гьелбетда хьи, уьмуьр нукьсан
Галачиз хьун вич туш мумкин.
ГъалатI квачиз жедач инсан,
Эхна кIанда крар четин.

Веревирдун чи буржи я, 
Файда галай, хийир галай.
Уьмуьрд эхир нетижа я, -
Алакьайвал уьмуьр гьалай.

Руьгь шад ийир тухун уьмуьр, -
Алакьунрив лайих акур.
Разивилелд ягъа муьгьуьр…
Несилризни чешне хьиз тур!