Зулун юкъуз булахдал

Зулун юкъуз атана вун, лезги руш,
Чи булахдал назик къуьнел квар алаз,
Куьлуьз-куьлуьз вегьиз камар рик1из хуш,
Яргъи кифер юзазавай дамах гваз!;;;

Ви к1вачерин гелерин ван атайла
Булахдин ци хуш аваз хьиз кьат1ана.
А к1вачери кьец1ил къванер гатайла
Са легьзеда шур-шурдин ван ат1ана!;;;;

Хьанай хьи заз яд акъвазна мурк хьана
Вичин винел ви суьрет таз алахъна,
Ракъинин экв це акьуна нур гана,
Гъилин къеняй алмаздин зар авахьна!

Валлагь зул туш, гатфар я къе гуьлуьшан
Ви вилери ятара нур ац1урна,
Уяхарна т1ебиатни перишан-
Зулун пешни таза цуьк хьиз юзурна!

Са мелгьем я кварцин къене авайди
Кайи рик1ин ашкъидин ц1ай туьхъуьрдай!
Бахтавар я, гуьзел руш, вун жагъайди,
Хъфена вун булах туна суьгьуьрда!