Уьмуьр, замана...

Вуч куьруь я, шаир, уьмуьр инсандин,
Гатфарикай зул ийизва фелекди!
Гатайт1ани вун  гарари замандин,
Какур жезвач, вилик физва дуьз рехъди!

Гьикьван йигин кам вегьейт1ан агакьдач
Рик1ин къене муг авунвай мурадрив.
И фикирри зун секиндиз ахъайдач
Гзаф яргъа мензил ава хиялрив!

Физва, физва акъвазавач вахтар чи,
Рик1 ц1разва ч1ехи мурад къеневаз!
Чарабуруз яр хьанава бахтар чи,
Са югъ хьанач и дуьняда к1ани чаз!

Фагьум, фикир гьикьван яргъа къекъвейт1ан
Хайи чили гуж гузава зи тандиз.
Дердери зун гьар кьуд патай чуькьвейт1ан
Зи пак гьиссер чк1изава ватандиз!

Жув вегьейт1ан йифди-югъди ц1аяриз
Вучайт1ани ч1уруз къведа гьар к1валах,
Гатун юкъуз дуьшуьш жеда къаяриз
Бахтунин чин элкъведамаз кирс патахъ.

Са зерре кьван бахтни канда инсандиз-
Ич1и гъилив дагъ чкадлай юзурда.
Гьалал фу хьуй, неда, валлагь, явандиз,
За къванцикай жавагьирар гьазурда!