Дидед ч1алал рахадач зун

Зи культура хьанва кьакьан,дидед ч1алал рахадач зун,
Диде, буба лезги ят1ан, лезги ч1алал рахадач зун!

Ингилисрин ч1алалди къе вири дуьня рахазва хьи,
Урус ч1алахъ авай къуват гьар са касдиз аквазва хьи,
Чара ч1алар хуш я рик1из,япун к1анал алазва хьи,
"КЬ"-дин, "П1"-дин татурай ван,дидед ч1алал рахадач зун,
Диде,буба лезги ят1ан, лезги ч1алал рахадач зун!

Суьлейманан рехи бармак низ герек я и дуьняда,
"Лезгинкадал" кьуьлзавайбур куьз герек я и дуьняда,
Модный хва я девирдин зун,хкадарда "Ламбададал"
"Диско", "Рок" я зи рик1, зи чан, дидед ч1алал рахадач зун,
Диде, буба лезги ят1ан, лезги ч1алал рахадач зун!

Хешил вуча, хинк1ар вуча, ахмакь яни зун т1ини нез,
"Столичный салат" т1уьна гун тавуна п1узариз мез,
Гуляж, жарко,харчо ва борщ чан алачни зал не тежез
Афар, цик1ен хьанва дак1ан, дидед ч1алал рахадач зун,
Диде, буба лезги ят1ан, лезги ч1алал рахадач зун!

Кьеж квай чка, телефонар гьар са касдиз жедач кьисмет,
Пул самбар тир вик1егь хцин куьз герек я намус, гъейрет,
Къачун патал жуваз дигай везифани хатур гьуьрмет
Кьада жуваз яр-дуст шейт1ан, дидед ч1алал рахадач зун,
Диде, буба лезги ят1ан, лезги ч1алал рахадач зун!

Садбур ава, "лезги" лугьуз текъвез кьарай, ийиз гьарай
"Чира тарих, дидедин ч1ал"- акъудмир т1ун зи япарай,
Гьажи Давут,К1ири Буба акурай квез лап ахварай
Шарвилияр мах я гьак1ан, дидед ч1алал рахадач зун,
Диде, буба лезги ят1ан, лезги ч1алал рахадач зун!

Мугъаматни "Яблочко" я зи аялрин мецеллайди,
Робин Гудан "панамадиз" уъшар я зи кьилеллайди,
Хуьруьз камни вегьидач за, пич1и руг я чилеллайди
Шегьерд юкьвал гиликьайт1ан, дидед ч1алал рахадач зун,
Диде, буба лезги ят1ан, лезги ч1алал рахадач зун!

Диде, буба квез хьуй масан, дидед ч1алал рахадач зун,
Зи культура хьанва кьакьан, лезги ч1алал рахадач зун!

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.