Зи ватанда

Гьар пакамахъ цава гъетер ц1радайла,
Каспид винел рагъ хъуьреда зи Ватанда!
Цуьквер галаз тама къветер рахадайла,
Рангар жеда гьар жуьреда зи Ватанда!

Хьран к1валей гум акъатда какур-какур,
Къчад афар, як1ун цк1ан - суфрад абур,
Къведа вилик кьуьзуь баде гъиле са кур
Гьатна гъилер пак гъуьреда, зи Ватанда.

Гатун цик1из дагъдин хуьруьн тик рекьера
Экуьн кьиляй ацукьайла чиг векьерал
Хуп1 кан я заз шагьвар къугван зи мекерал
Хуш лирлийрин ванер къведа зи Ватанда

Лап кьакьанра циф илифай сув синерал,
Вик1егь халкьар, азадвилин нур вилерал,
Уьмуьрзава, саф зегьметдин т1ур гъилерал,
Мерд рухваяр -  гьар мягьледа зи Ватанда.

"Перизада", "Гуьзел Тамум", "Магьи Дилбер",
"Лезгинкадал" кьиле физва сувар, мехъер,
Чи жегьилрин к1вачерик ква аламат, звер,
Иер рушар са жергеда зи Ватанда.