Мекьи я заз

Марфар, гарар къвезва винел, я чан  аллагь, мекьи я заз.
Зи гьаваяр хьанва ч1имел, я чан аллагь, мекьи я заз.

Жуван ч1алал кьакьан баяд лугьудай за,лал хьанва зун,
Ацукьзавач гаф зи мецел, я чан  аллагь, мекьи я заз.

Ч1уруд гьим я, дуьзнед гьим я, чир хъжезмач, буьркьуь хьанва
Циф ацалтна зи кьве вилел, я чан аллагь, мекьи я заз.

Дад хъгузмач кьел, ц1вегь квачир кьуьзуьбурун ихтилатри
Къайи хьанва мехъер, чи мел, я чан аллагь, мекьи я заз.

Зурзазва Рагъ, зурзазва Варз, аватзава цавай гъетер,
Къайи гьекьер алаз пелел, я чан аллагь, мекьи я заз.

Заз дуьняда аквазвайбур рик1ин къене хьанва дердер,
Пехъ мугьман я хуьруьн кимел, я чан аллагь, мекьи я заз.

Шагьмардан я къекъвезвайди хъуьт1уьн юкъуз гад-гатфарик,
Алк1анва къе мурк1ар рик1ел, я чан аллагь, мекьи я заз.