Шагь сув

Гьикьван вахт тир ви кьакьанри ялиз зун,
Хиялра физ "ц1айлапанрин к1вализ" зун,
Ви лишанар Шагьнабатдай к1ват1из зун,
Зун Муьшкуьрдай саламар гваз атанва,
Пак мурк1ара ц1ук, ц1аяр тваз атанва!

Ирид хуьрер, ирид п1ирер алатна,
Тик синерал к1вачер, гъилер галатна,
Къванци рекье шалвард кикер хкатна,
Рик1ин къене шиир "храз" атанва,
Ви ашкъидик иви ргаз атанва!

Чи бадейрин махаравай инсанар,
Къванцин к1аник к1евирнавай шейт1анар,
Кас бубадин хтулар тир алпанар,
Жуван вилив жуваз акваз атанва,
Рик1ин са пад Каспид(а) амаз атанва!

Каспид винел Рагъ "дидедиз хьайила",
Ви синерал нур чигедиз гайила,
Жагъура кван чи дигедиз тай гила,
Цуьквед атир шагьвар галаз атанва,
Илгьам пери къе зи патаз атанва!

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.