Гьуьжетун Шагьмардан - Эйваз

ШАГЬМАРДАН
Чанда шагьвар къугъвазава гуьзел сунадин
Акьадамаз адан чина гар т1имил-т1имил.
Алугзава ц1ай кьуна шал лацу жунадин
Алахьдамаз вилерилай зар т1имил-т1имил.

ЭЙВАЗ

Гьатнавани вун ашкъидин дегьне ахвара,
Ак1анвани муьгьубатдин верц1и махара?
Сунайривай мелгьам кан яз, жемир фугъара
Зиярата жуван верц1и, яр т1имил-т1имил.

Мад жегьилрин, рик1ер вуна кьеч1емир пара,
Яш фенава, таватривай кан жемир чара.
К1вале ава, ви Рагъ, ви Варз къекъвемир пара
Акьада ви кьиле шаир, хар т1имил-т1имил

ШАГЬМАРДАН

Хуьруьн са пад рагъ элцифай кьакьан тирин тир,
Накьанан югъ къениндилай гзаф серин тир,
Ярдин багъда яру п1ини вирт хьиз ширин тир,
Яреб, дуня жезва рик1из дар т1имил-т1имил.

ЭЙВАЗ

Гьик1 ялзава, гъвеч1и танда икьван ч1ехи гъам?
Аквазва заз шуп1зава вун, гьижранди тамам,
Фад дигишра и легьзеда, "ашкъидин макьам"
Кьаз хьурай на кани ярдин, т1вар т1имил-т1имил.

ШАГЬМАРДАН

Са легьзеда верци макьам къведа мецел зи,
Лугьуз жедач, ивидин сел ала херел зи,
Яраб, гъамар кхьенват1а анжах пелел зи,
Акьазва за заманадин к1ар т1имил-т1имил.

ЭЙВАЗ
Гаф ава заз чи "Марвардин" дамахдиз:-
Вун шаир я, авахьзавай булах хьиз.
Апхиш къвезва ийизавай к1валахдиз,
Амма яла,заманадин пар т1имил-т1имил.
Кхьиз тахьуй, вуна мирес ц1ар т1имил-т1имил.

ШАГЬМАРДАН

"Марвар" - гатфар, "Марвар" - шагьвар, булах я,
Ам чи халкьдин къенивилин дамах я,
Пакам йикъан экверал зун ч1алах я,
Кутан чна гьар ц1верек1дик т1вар т1имил-т1имил.
Шийриййатдин т1инидикни гъвар т1имил-т1имил.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.