Перейти к основному содержанию

Гьуьжетун-3 Шагьмардан-Эйваз

ШАГЬМАРДАН
Куь арада са руш ава Рагъ хьтин,
Акурдилай инихъ амач захъ зигьин,
Шагьмардан къе четин к1вализ сагъ хъфин,
И кар ада фагьумзавач, вучин за?

    ЭЙВАЗ
Чи Шагь шаир, ях хьанава, тахт амач,
Кьил акахьна таватарихъ, вахт амач.
Рагъ хьтинда, "эхь" лугьудай бахт амач
Межнун хьанва, Керем хьанва вучин за?

    ШАГЬМАРДАН
Гьижранд йикъар яваш-яваш акъудда,
Рушан рик1ив за канивал агудда,
Са юкъуз ам дидедивай къакъудда
Ада зи дерт кьат1узавач, вучин за?

    ЭЙВАЗ
Канивили кайибурун шагь хьана,
Гьар нефесдин и кьил, а кьил агь хьана.
Кьиляй-кьилиз мани хьана, мах хьана
"Рагъ" такуна ,верем хьанва вучин за?

    ШАГЬМАРДАН
Т1ебиатдин к1валах хьанва марф шехьин,
Тарар кьец1ил, жибин кьезил, бахт четин,
Лагь кван Эйваз, за и савда гьик1 эхин,
Са тават заз вирт, чем ханва, вучин за?

    ЭЙВАЗ
Жибин рик1 хьиз михьи хьайла четин я,
Ашкъидилай гъил къачунни рекьин я.
Зи Шагь шаир дили хьун лап якъин я,
Кафандикай перем хьанва, вучин за?

    ШАГЬМАРДАН
Т1ебиатдин рангар гила дегиш я,
Таран пешер шуьткьенава, пириш я,
Яраб, и ашкъ за акьунвай къаргъиш я?
Зи хенжелди ат1узамач, вучин за?

    ЭЙВАЗ
На заз яб це, стха ви т1ал алахьда,
И савдани пархун хьана авахьда.
На гъил къачу, тахьайт1а рехъ акахьда
Ви азабар бегьем хьанва, вучин за?

Добавить комментарий

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.