Жаваб

Канивал са аламатдин илим я,
И илим на чир авуна ахпа лагь!
Эхирда кьван ашкъ эхайди итим я,
Гуьзелдикай п1ир авуна ахпа лагь!

Гьар макьамдиз вичиз дигай кьуьл жеда,
Рушан юкьва зар гимишдин ч1уьл жеда,
Авам касдиз вири бверкьуь гъуьл жеда,
Гафуникай к1ир авуна ахпа лагь.

Ариф касдиз ашукьдин дерт чир жеда,
Ашкъ тахьайт1а дуьнядин эхир жеда,
Са юкъуз вун гуьзелдин эсир жеда,
Сифте гъиле чуьнгуьр кьуна ахпа лагь.

Гаф лугьунал, дуст кас, вунни "устад" я,
Бишме алай тават вини мурад я,
Муьгьуьббатдин гъезел кхьин  ваз фад я,
Гафарик на кьел кутуна ахпа лагь.

Заз чизвайди Пифагоран илим я,
Пеше анжах Эйнштейнар к1елин я,
Дуст кас, хьана, види "ц1ирим-ц1ирим" я
Алимривай сирр жузуна ахпа лагь.