Суьргуьнда

Яргъалди яргъал тир хуьре хьун,
Гьар чIавуз заз куьне къехуьнда.
Вуч тахсир себеб яз, куьне зун
Авалда и кIеви суьргуьнда.

Вирида чIугвазва язухар,
Фенд ялда ксарин са бязи.
Гьавайда кьежирмир яйлухар,
Зун туш хьи а кардал нарази.

Квез хуш тир, куь рикIи чIугунай
Къуншивал газетриз, журналриз.
Анжах заз артух яз акунай,
Мукьва хьун яркIарин чумалриз.

Хур гатаз, гьурбатда ацукьна,
За хвавал ийидай ватандиз?
Тумаждин валчагъар алукIна,
Хуькведай зун иниз мугьмандиз?

Ахьтин югъ такуй гьич душмандиз.
Зун жуван кьисметдал кьару я.
Бес вучиз ава икI пашмандиз?
Хкуьрмир, ам маса пару я.

Кими туш йифди куь япарай
Векъи ван машинрин пипипIрин,
Зун ина вегьезва ахварай
ДакIардихъ цIивзавай цицIибри.

Чидани, шумудра куьруь я
Ина рехъ инсанрин рикIериз?
Шадвилин иесар вири я,
Дертлуйри дерт кIевда кIевера.

Ина гьич, гужлуда гьарайна,
Ажузда кьил агъуз гъидай туш.
Дегишвал хас я и гьавайриз,
Итимриз дегиш хьун чидай туш.

Гьахьзавач кичIела, регъуьла,
Къуншидин кIвализни, угъри хьиз:
Рак гатун герек туш - вун ина
Кьабулда гьар сада, багъри хьиз.

Ина фу гудач ваз алцумна,
Гьалтайла, гьар са кас луькIуьнда...
Гила заз жаваб це, фагьумна,
Чакай вуж аватIа суьргуьнда.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.

Похожие материалы