Ватан

Зи хайи чил,
Зи гьвечIи чил,
Азиз тир ватан,
За вуч ийин,
Кьисмет я ман,
КIан я вун гьакьван.
Зи тахсир туш,
Масана ваъ,
Вал хана лугьуз
Рагъни, марфни какахьнавай
ЧIимел тир зулуз.
Зи хайи чил,
Зи экуь чил,
Гьиссерин макан,
Масана ваъ,
Ви хурава
Бубадин лакьан.
Каспий гьуьл кьван,
Дерин я вун.
Шалбуз кьван кьакьан.
Самур там кьван,
Серин я вун,
Чирагъ кьван кIубан.
Зи хайи чил,
Зи гуьзгуь чил –
Дуствилин меркез.
Гьар са хуьре,
Гьар са кIвале
Чин ачух я квез:
КIан хьайитIа,
РикIни гуда,
Акъудна хурай,
КIан хьайитIа,
Муркни гъида
Шалбуздин кукIвай.
Зи хайи чил,
Зи кайи чил –
Бубайрин тарих.
Дустарив хьиз,
Душманривни
Гвазва ви тариф.
Тур гъилеваз
Атайбуруз
Авунач инсаф,
Багъри сурар
ТIимил я вал,
Душманрин - гзаф.
Зи хайи чил,
Зи рехи чил -
Азиз тир ватан,
Маса затIни.
Тек са вун я
Зи кьин, зи кьуркьан.
Каспий гьуьл кьван,
Дерин я вун,
Шалбуз кьван кьакьан.
Самур там кьван,
Серин я вун,
Чирагъ кьван кIубан.
Зи хайи чил,
Зи чIехи чил -
Зи тIал, зи дарман...

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.

Похожие материалы