Ксумир шаир

Эвер гузвай телефонди
Ванцихъ чIун галаз.
Захъ Камранан ван галукьна
Гъиле кьун галаз:
-Дуьня икьван мили чIавуз
Ацакьмир кIвале.
Цуьк-цуькведал аруш хьанва
Къелем яхъ гъиле.
ТIем кьабула гирвейрилай
Иер я Ватан.
КукупIдикай шиир кIела
Аладарна ван.
ЦIийи гафни, цIийи мани
Фикир кIанда заз.
Чуьлдин цуьквед атир галай
Шиир кIанда заз.
Хуш экуьн хьиз жув лагьана
Алайла шиир.
Дидед чIалан лезет туна
Ксумир шаир…
…Лув гана за, кьакьан синел
Ягъана кьуьнтеб*:-
И пел мет я, и чил диде
И дагълар зи кьеб.
Аста къекъуьгъ куьн зи рикIе
Сел ава дустар.
Дидед чIални, хайи чилни
Эл ава дустар.
ЯхцIур йисан иер нехиш
И бахтунин хал,
Рагъ рахана рикIихъ галаз
Зи верц1и чIалал.
Зурзун галаз гьар са рахун
Фена тандикай.
СтIал-стIал куьз хьанази
Руьгьдин чандикай.
И чешмедай тек са капаш
Алахна рикIиз.
ПIир тавуртIа лезгишиир
Айиб я рекьиз.
Шукуьр хьурай лал хьанач зун
ЧIал хьана мецел.
РикI къелемдал аруш жезва
Къелемни рикIел.

Комментарий кхьихь

Ограниченный HTML

  • Допустимые HTML-теги: <a href hreflang> <em> <strong> <cite> <blockquote cite> <code> <ul type> <ol start type> <li> <dl> <dt> <dd> <h2 id> <h3 id> <h4 id> <h5 id> <h6 id>
  • Строки и абзацы переносятся автоматически.